本文重點
絲絲同工信部老友吹開水，佢話就佢所聽嘅路邊社消息，部門首長李毅中有條不成文嘅規矩，就係「周六一定不休息，周日休息不一定」，哈哈！絲絲依稀記得聽中石化（00386）啲老友講過呢樣嘢，原來呢個十年不變嘅規矩，係李總由中石化帶到工信部添。
至愛牛肉麵
講起李部長，絲絲最難忘係佢嘅勤力同拚搏，所以上述嘅不成文規定，絲絲早喺○○年時喺中石化老友果度聽過，估唔到成十年之後，李部長成64歲，真係十年如一日，完全無變過，唔知佢仲係唔係好似當年中石化上市前嚟香港咁，食唔慣香港嘢，要周街搵佢嘅至愛牛肉麵食呢？!
如果講呢個規矩係李總獨家，李毅中以前係喺中石化做老細，搞完中石化喺香港上市嘅重要任務後，佢又調咗去國資委搞全國嘅企業；無幾耐又調咗去國家安全生產監督管理總局做局長，依家就喺工信部坐鎮，咁即係話，唔單止中石化同工信部，其他如國資委及安全生產監督管理總局嘅官員都應該清楚佢嘅脾性。
余絲韻