俄鋁尋日起展開上市前路演，雖然今次佢喺香港上市「謝絕散戶」，但聽聞仍有經紀行可能會為俄鋁「預留」孖展，一家經紀行負責人話，佢哋都有客查詢俄鋁，如果個客想要，都會幫佢哋做融資，當然個客投資前要經過合適性評估。經紀行亦不排除喺俄鋁上市後，會為客戶提供三至四成孖展，大家都知，俄鋁上市後每手入場費最少二十萬元，如提供三至四成孖展，散戶或者都有興趣「博番鋪」！

輪商可過江星洲發輪

俄鋁上市時市值夠晒大，市場關注香港可唔可以喺俄鋁上市初期准發窩輪，不過有市場人士就話，輪商亦可以「過江」喺新加坡發，到時仲可以出啲近乎零溢價嘅窩輪，即等同正股，香港散戶屆時咪可以「過江」去新加坡炒俄鋁，入場費仲唔使咁貴添！輪商依家普遍正注視俄鋁上市情況，暫時未決定發唔發輪。

余絲韻