新一年頭一個交易日，港股早段係威係勢，可惜尾市腳仔軟，未能開出紅盤，然而大市成交亦唔算多，連500億都唔夠，看來市場仲係好重放假feel。之不過啲股仔就相當活躍，假前唔少鑊鏟友提早收爐，尋日全體出動，動力返晒嚟，農業、汽車同資源板塊成為焦點，股份動輒出現一成甚至三成以上的升幅。
內需概念依然熱爆市場，正所謂民以食為天，糧油食品更係必需品，但隨着環球糧食價格上升，好似中國食品（00506）呢類食品股更係基金近期至愛，單睇隻玉米油（01006）炒個不停，就知市場需求有幾大，中國食品背後有母公司中糧集團支持，市場佔有率更高達52%，買股當然買龍頭。早前市場盛傳會注資，近期大行紛紛提高晒佢嘅目標價，相信第一季依然會係當炒股份，暫時向上先睇9元，以6.4元作止蝕。
古晨