古勝相信今個星期開始，缸邊友將陸續回歸，市場焦點重新返到花旗將公布的一連串經濟數據方面，包括十二月份ISM製造業採購經理人指數、十一月成屋銷售數據、工廠定單和耐用品定單修正值、最重要係周五公布的十二月「做嘢數據」，均會揭示花旗經濟復甦速度，華爾街亦會藉此預測聯儲局何時邀「息魔」復出，以及何時退市。

新丁股繼續成焦點

本地魚缸升至二萬二遇阻力可以理解，始終紅色錢莊跟紅色地主表現較疲弱，拖累大市表現。不過，個別板塊仍有炒作，半新丁及新丁繼續成為焦點，鑊鏟友不愁寂寞。

大隻佬個別發展，升幅冠軍富士康（02038）有缸湖傳聞指獲得歐洲電訊商Orange的手機定單而表現出色，升近6%，報收9.56元。巨無霸祖國移動（00941）在73元水平附近整固，市場仍憧憬祖移好快回歸A股，同時亦有追落後效應。另一重量級大笨象（00005）靠穩，報89.25元，早前其在88元找到較強支持，股價整固後或有機會重上90元的心理關口，古勝相信首季有望重拾紅底股身份。和黃（00013）續呈強勢連升四日，昨日更突破54元，最終收報54.05元，升1.22%，多得高層霍建寧跟進超人增持。

至於紅色分子，屬民企的代表中國稀土（00769）勁升近四成，缸湖傳聞祖國欲禁止稀土出口，不過古勝估計，稀土急升唔係單單因為上述傳聞咁簡單，表叔線話仲有後着，至於係乜料，古勝烏卜卜，但相信都係離唔開重組注資等消息。古勝今年睇好內需股，其中紅色呠呠車繼續會係重點投資板塊。去年北大人一句加快汽車業整合，加上要狂谷內需、刺激高消費、扶持產業發展，多項政策傾斜，已帶動紅色呠呠車股價勁升。唔少看官或有畏高症，但在下有信心，呢個板塊今年十拿九穩無得輸。

內地車市未見放緩

內地汽車製造業經歷去年的急速增長後，預期今年可續寫強勁增長故事，政府補貼加上居民購買力強勁，尤其係城鄉居民積累巨額財富，足以支持汽車消費市場。東風汽車（00489）一向係古勝至愛的紅色呠呠車，雖然中央對小排量汽車的購置稅寬減幅度減半，但對買車成本帶來的影響，僅為車價的2.5%，以小排量汽車售價在4萬至10萬元計算，買車成本只增加1,000至2,500元人仔，對買家實質影響有限。呢個措施對東風盈利影響輕微，卻為其股價整固回調提供咗藉口，看官可把握機會上車。

集團超額完成今年度銷售目標，毛利率上升至17.9%，上半年股東應佔溢利上升5.6%至26.06億元，綜合市場預測，幾架紅色呠呠車中，最低估值係龍頭東風，明年預測市盈率為12.29倍。買股要買龍頭股，仲要係最抵買嗰隻，看官咁醒一定識揀。

古勝