今日大除夕得半日市，相信又係靜靜局局，詩詩手持首長國際（00697），尋日開市連2元都突破唔到，第一時間以1.96元跳車，幾格有胡食，總算喺○九年結束前攞番個尾彩。
今日心水係中國森林（00930），事關呢幾日半新股最受捧，中國森林上市不足一個月，兼且上市以來無乜炒過，值得關注。集團係中國三大私營自然再生林及人工森林營運商之一，業務集中上游林業。中國森林旗下林地逾九成可即時採伐，今年採伐量料達69萬立方米，明年採伐目標已完成規劃，預期多於今年水平。
內地在十月底推出《林業產業振興規劃》政策框架，已列明育林費用將比現時調低50%，有助降公司整體伐木成本和提升毛利率。中國森林招股書預測○九年度每股盈利不少於0.17元，即現價市盈率12倍。近日該股重上水面，其他新股閒閒地炒高五六成，以呢個幅度計，該股可炒上3.1元，屆時市盈率都不過18倍。
詩詩