本文重點
其實好多香港人都熱心公益，出錢又出力，就好似身兼康健國際（03886）及「心連心行動慈善基金」主席嘅蔡加怡咁，佢雖然日理萬機，但都不忘走去清遠陽山縣杜步鎮做善事，事緣係呢排天氣超凍，蔡加怡就親身去當地一所由佢捐助嘅學校，捐出一批禦寒衣物畀有需要嘅學童。
心連心基金捐修校舍
「心連心行動慈善基金」早於今年八月已捐咗50萬元，資助清遠陽山縣杜步鎮中心小學修建校舍，仲起埋個運動場，據聞個運動場有環形跑道、小型足球場、操場、單槓及雙槓設備等，希望學校除咗可增進學童知識之外，仲可以增強體魄，令佢哋名副其實咁茁壯成長，而間校舍就命名為「心連心杜步中心小學大樓」。
絲絲聽聞之前杜步鎮啲同學仔連足球係乜都唔知，諗起都幾心噏。原來做善事唔係淨係畀錢咁簡單，仲要用多啲心思同心力，咁先可以為有需要人士提供更全面協助。
余絲韻