有謂「家有一老，如有一寶」，新鴻基地產（00016）副主席郭炳江都深明呢個道理，佢對於喺新地工作超過30年嘅老臣子都奉為「新鴻基之寶」，喺今晚除夕夜，佢仲專登慰勞呢班勞苦功高嘅老員工，邀請佢哋出席觀賞今晚喺國際金融中心（IFC）舉行嘅「除夕倒數詠香江」煙花匯演，實行與眾同樂。
慰勞做滿30年夥計
老友同絲絲講，話今年新地畀咗150萬元贊助旅遊發展局舉辦「除夕倒數詠香江」煙花匯演，所以大會專登預留咗50個喺主禮台旁邊嘅嘉賓位畀新地，郭炳江就花盡心思諗吓究竟請乜嘢嘉賓出席，佢突然靈機一觸，諗起呢班為新地付出咗超過30年努力，見證住新地成長嘅「老臣子」。
依家新地有逾40名員工喺公司做咗超過30年，佢哋可報名與家人參與今次活動，如果有餘位，新地仲會邀請部分已榮休嘅員工出席。
絲絲聽聞呢班老臣子喺睇煙花匯演之前，仲有個船河酒會，總之齊齊吃喝玩樂，迎接新一年嘅來臨。
聖誕節前已出雙糧
除咗睇煙花匯演外，原來新地每年喺周年聚餐晚會都會向員工頒發長期服務獎，老友笑言喺今年初嘅周年晚會中，副主席郭炳聯都剛好做滿30年，仲獲得兄長郭炳江親身頒獎畀佢，當時兩人都忍俊不禁相視而笑。
新一年將至，新地亦好識做，喺聖誕節前已經出咗雙糧，等大家過一個快樂聖誕，至於花紅就要農曆新年前先知，希望到時會有驚喜啦！
余絲韻