今日又得半日市，市場仲係好重放假氣氛，市場上動作唔多，尋日突然傳出內地短期會推出期貨買賣，一度刺激恒指反彈，惟市場對消息反應十分一般，願意追貨者唔多，交投仲係好淡靜，睇怕要等新一年才有一個新開始。
等待新一年開始，自然要部署吓如何搵食。過去一年大市反彈咗咁多，相信要再發掘落後股都唔會易，年中一度熱炒嘅電動汽車概念，隨着市場進一步成熟，未來一年會有好大發展空間。
天能動力（00819）主要生產動力電池，自從十月炒過一轉後，輾轉間又落番低位，近月內地汽車銷售數字大增，市場慢慢又會再炒番電動汽車概念股，近期股價跌至3元開始有支持，股價開始回穩有反彈，不妨把握低位儲吓貨，隨時明年炒番上5蚊都唔奇，既然3元水平有支持，止蝕位可以定於2.9元。
古晨