本文重點
唔知同個名有冇關係，今年張家輝發展得唔錯，讀者唔好誤會，絲絲講緊嘅唔係新科「六料影帝」張家輝，而係同佢同名同姓嘅和嘉資源（00704）財務總監張家輝（Alex），不過佢笑笑口話最近開始想改名，皆因成日有人打電話嚟恭喜佢攞影帝喎！
和嘉財監同名同姓
絲絲係家輝影迷，所以喺幾年前認識Alex時已留意到佢同家輝係同名同姓，Alex就話間唔中有朋友用「張家輝」呢個名同佢講笑，不過最近就周不時有朋友無厘頭打嚟恭喜佢，Alex初時都一頭霧水，後尾先知原來係因為張家輝憑住電影《證人》成為「六料影帝」，佢仲笑笑口話啲朋友搞到佢差啲想改名添！
「張家輝」今年似乎運程唔錯，皆因唔止影星張家輝攞影帝，Alex最近都被委任兼任和嘉執董。事實上，絲絲覺得兩位張家輝都有唔少相似嘅地方，好似家輝同Alex都捱咗好耐先至有今日嘅成績，而兩位其實都係一個好爸爸添。
余絲韻