古勝又唔係太擔心大笨象要抽水，年初供股已令其財務實力大增，加上大笨象唔似得「花旗邦」跟花旗錢莊，要進行集資籌旗還債畀華府，大笨象被質低，不過係大戶推低大市的藉口。反而祖國魚缸走勢每況愈下，美元強勢反彈拖累魚缸下跌，缸邊友擔心資金加快流走，拖累本地魚缸走勢轉弱。恒指上周五險守21,000點，散場收報21,175點，跌171點或0.8%，一周累計跌727點。

美元走勢左右股市

至於上周五花旗魚缸，在火雞股季度成績表理想刺激下，本來腳軟的道指，午後亦見改善，散場報10,328點，升番廿點好過無。花旗本周將公布多項經濟數據，在下相信本周的市況更為波動。

上周五花旗撞啱「四期結算」，加上發卡機構Visa等五家企業加入成為標普指數成員，刺激紐交所的股票成交量升至破紀錄的31.5億股，較全年平均每日成交量13.9億股多逾一倍，亦打破去年九月十九日雷曼兄弟申請破產後的四期結算日的成交量紀錄。不過，呢個數字只係個別情況，對花旗魚缸後市啟示不大，古勝預料呢個月餘下交易日，交投會相對淡靜。

本地魚缸能否反彈，除取決於美元走勢，祖國魚缸的走勢亦相當重要。祖國調控樓市情況愈演愈烈，紅色地主跟紅色錢莊首當其衝，若然祖國魚缸跌勢不止，本地魚缸將雪上加霜，反而古勝唔太擔心資金流走，皆因近日流走資金僅屬小部分，相信係由於金管局發行票據，以及新丁登場集資活動所致。

恒鼎實業（01393）日前發出通告，披露該公司自○七年九月上市後，已於祖國額外收購23個煤礦。截至本月中，該公司共有42個煤礦，現有儲量及資源顯示平均開採壽命為50年。恒鼎現時於煤礦附近的不同地點擁有8個洗煤廠，其中兩個洗煤廠位於雲南省富源於今年收購，洗煤廠各自有原煤年入洗能力45萬噸。

利好煤價因素仍多

近日祖國煤炭供應有短缺之勢，加上煤礦意外事故及行業整合減速，預計令明年的年產量放慢，同時水泥、鋼鐵及電力等下游行業需求強勁，有預測指秦皇島煤價或上調8%至每噸730元人仔，即按年增幅16%，料恒鼎可受惠。

煤炭股在上周脫穎而出，逆市向上，在目前的市況，難得有強勢股，所以古勝亦大膽推介。較早前「瑞士佬」調高三隻煤炭股的目標價，恒鼎的目標價被調高至11.84元，維持「買入」評級。

古勝