本文重點
聖誕節將至，喺呢個普天同慶嘅佳節前夕，多間本地銀行不約而同為弱勢社群舉辦慶祝活動，除咗履行企業社會責任之外，亦體現愛與分享嘅聖誕精神。
恒生包場請睇音樂劇
恒生銀行（00011）會喺大會堂包場贊助香港話劇團《奇幻聖誕夜》音樂劇，招待400名嚟自低收入家庭嘅小朋友及家長；中信嘉華銀行就舉辦咗「聖誕愛心玩具捐贈大行動」，將收集到嘅玩具派發畀53位嚟自小童群益會兒童之家嘅小朋友，仲開埋聖誕派對。
滙豐早前亦聯同心光恩望學校舉行同樂日，雖然主題與聖誕冇乜太大關係，但絲絲覺得活動相當有意義。當日滙豐義工與十幾位有視力及智力障礙嘅學生、家長以及老師大玩非洲鼓樂，並安排同學穿上滙豐職員制服，親身體驗銀行前線員工嘅工作，從而增強佢哋嘅自信心。
恒生副董事長兼行政總裁梁高美懿最近喺佢個Blog度話，要活出聖誕節意義，向身邊嘅人送上祝福，唔好令聖誕節淪為消費主義掛帥嘅空殼節日，絲絲覺得呢一點好值得同大家分享。
余絲韻