本文重點
味千（中國）（00538）位於IFC嘅新品牌拉麵店「和歌山」已經喺月初開張，絲絲親身去試過啲拉麵，果然係好食啲，不過一分錢一分貨，聽佢哋嘅管理層講，普通味千店人均消費多於56蚊，而「和歌山」嘅人均消費就一定過百嘞。
佢哋嘅董事會秘書黃念解釋，味千品牌一向走中檔路線，為咗公司發展就加多個高檔品牌，預期呢間舖頭一至兩個月就可以收支平衡，未來會再睇情況喺香港甚至內地開多幾間「和歌山」。至於點解叫「和歌山」？黃念就話和歌山係日本皇家花園，亦係好多高端食店嘅發源地。
明年再開120分店
對於未來發展計劃，味千中國首席財務官劉家豪話，明年資本開支約3.8億至4億元，其中包括喺中港開設120家分店，香港佔6至7家，到時味千總分店就會突破500家。
佢又話今年下半年業務持續轉好，上半年中國業務同店銷售輕微下跌，希望全年可以持平，香港方面嘅同店銷售就由於上半年跌得太多，所以好可能全年會錄得倒退。
余絲韻