本文重點
聖誕節係普天同慶嘅大日子，摩根士丹利每年都組織班管理層一齊唱聖誕歌，慶祝聖誕之餘仲為慈善機構籌款。今年大摩80位管理層就喺聖誕樹下獻唱7首歌，負責領唱嘅亞洲首席執行官唐奧文就宣布，今年嘅善款數字有190萬元，破晒歷來紀錄，咁開心，唐奧文仲帶埋囡囡一齊唱聖誕歌添。
話時話，今年已經係大摩第12年支持「愛心聖誕大行動」（Operation Santa Claus），佢哋仲組織咗個董事合唱團，通過歌聲籌款，而大摩班管理層亦已經連續7年獻唱。
籌得190萬捐助癌童
今年經濟氣氛好轉，連帶捐款亦特別多，喺本月十一日起嘅短短一周，大摩嘅員工、客戶及夥伴已經成功籌到190萬元。今年嘅受惠團體主要係生命小戰士會（Little Life Warrior Society），佢哋主要幫助患有癌症嘅小朋友。
喺晏晝5點半，合唱團準時開唱，一齊唱嘅除咗有香港保護兒童協會嘅小朋友外，仲有好多管理層帶埋仔女一齊上台獻唱，佢哋一共唱咗7隻歌，由《平安夜》到《Jingle Bells》，啲歌愈嚟愈輕快，台下嘅觀眾亦一齊拍手和唱，十分投入。
余絲韻