大市連跌多日後，尋日終於狼來了，早前炒股唔炒市嘅氣氛突然間無晒，由於恒指頭肩頂危機仲未解除，尋日啲股份咁插法都幾危吓。
市場上繼續炒紅籌重組概念，近期炒重組炒到火紅嘅五礦系，尋日先有五礦建設（00230）停牌配股，料係為注資鋪路。五礦系近期動作多多，古晨仲記得十一月中有傳煤爆料指五礦集團想收購湖南有色（02626）四成股權，消息曝光後，湖南有色即時炒咗上3元，其後又了無音訊，今個禮拜突然見佢成交生猛晒，股價反覆炒上仲升穿埋上次高位。
尋日遇上大跌市，最後二十分鐘見沽落3.21元低位，點知突然有買盤全力掃上，最後以最高位收市，走勢都幾嚇人，計一計數二十分鐘內該買盤掃咗成800萬股，相信唔係一般散戶所為，走勢咁勁不妨吼實，向上睇4.5元，止蝕位就定於3元。
古晨