本文重點
咪以為梳淨係可以用嚟梳頭，正在招股嘅譚木匠（00837），聽講佢哋嘅梳連和尚都買嚟用，和尚無頭髮，買梳當然唔係用嚟梳頭，而係用嚟按摩，促進血液循環。
擁有60幾項專利
一把木梳最緊要係梳得順，但聽譚總講，佢哋嘅梳有成60幾項專利，聽起嚟好似好誇張，但就正正可顯示到佢哋對呢樣嘢幾咁認真。據譚木匠員工講，佢哋對好多細微嘅地方都考慮得好周到，例如梳腳好多時候都係尖嘅，好容易刮損個頭，所以佢哋特登整滑啲梳腳，等用家可以盡情享受。
譚總又話佢哋嘅產品最受年輕女士歡迎，內地譚木匠嘅梳可以當做愛情之梳，由男仔送畀女仔；又可以當做親情之梳，由子女送畀媽媽兼幫佢梳頭；仲可以當做友情之梳送畀老友。
另外，佢哋仲成立咗一個叫「譚木匠綠色行動」嘅組織，佢哋嘅承諾係「一年內我將至少植一棵樹」，回報大自然。
余絲韻