本文重點
內房新股佳兆業（01638）尋日粉墨登場，公司循例都會喺上市儀式上送禮物畀港交所（00388），不過，佳兆業送禮一啲都唔求其，送咗一隻手臂咁長嘅足金金牛畀港交所，以目前超高嘅金價計，相信都幾重皮。雖然依家已經係年尾，但仲係牛年，加上牛市係投資者最想見到嘅，送金牛真係應景之餘又有心思噃！
祝捷晚會星光熠熠
能夠上市咁高興，佳兆業尋晚亦都搞咗個祝捷晚會，新世界發展（00017）主席鄭裕彤、旭日集團主席蔡志明、英皇集團主席楊受成都有親身撐場。比較特別嘅係同屬內房新股嘅花樣年（01777）執行董事曾寶寶都有嚟到賀，睇嚟同行如敵國呢句說話唔能夠用喺佢哋身上嘞。絲絲仲八到，尋晚嘅祝捷晚會請嚟英皇一姐容祖兒同埋Boyz獻唱，相信班大孖沙同啲賓架都可以好盡興呀。
余絲韻