本文重點
新世界發展（00017）主席鄭裕彤嘅長子嫡孫鄭志剛早排娶老婆，絲絲尋日見到彤叔，第一時間恭喜佢之餘，即刻問吓彤叔恨唔恨抱曾孫，彤叔聽到就立刻笑到見牙唔見眼咁話：「愈快愈好啦」，似乎相當期待，Adrian收到冇？
健步如飛 永不言休
絲絲又問彤叔係咪想抱男曾孫多啲，彤叔就冇正面回應，可能唔想畀啱啱過門嘅孫新抱太大壓力啦。咁一旦Adrian「造人」成功，彤叔會唔會弄曾孫為樂，順便退休享福呢？彤叔就話「我依家已經有曾孫啦」。不過依家嘅係外曾孫咋喎，彤叔就話總之佢就永不言休，果然精力旺盛。
睇番新世界年報，彤叔今年其實已經八十有四，但絲絲尋日見佢仲係健步如飛，一身西裝加波鞋嘅「潮彤」打扮，足證彤叔心境仍然非常年輕，睇住咁大盤生意都有心有力呀。
余絲韻