深滬股市都有0.4%進帳，東瀛股市仲勁，升1.4%，唯獨港股要跌，恒指唔見咗173點，報收22,324點，國企指數亦插103點，收報13,358點，反映香港魚缸心態唔同，缸邊客更驚美國經濟一旦由深切治療部推番入去普通科病房，唔使幾耐聯儲局的退市就會出台，一旦加息刺激弱過藥煲嘅美元反彈，加速套息交易冚倉，對港股及港元資產不利。

當然咁係好極端嘅假設，尤其拆息市場昨日仲係風平浪靜，一及三個月短息如老僧入定，喺歷史低位停留不動，一年息口0.58厘，只係十月初嘅一半，太早驚加息，隨時錯過二三線股仔嘅狂熱派對。

「魔笛」奏旺富士康

到底錢熱有幾厲害？單睇藍色大隻佬都可以炒高一成七，唔多唔少感受得到，「大魔頭」以諾基亞定單情況比預期理想，以及聰明手機熱賣為理由，向客仔推介代工龍頭富士康（02038），目標價睇9.8元，消息幫助富士康走勢破晒位，高見8.3元改寫海嘯後新高。

年初祖國商務部以反壟斷法，阻止美國可口可樂向滙源（01886）提嘅親事，轉過頭，台資過江龍又打算搶親，台灣傳媒引述統一企業高層話有興趣增持滙源，甚至提出收購。要知可口可樂、滙源及統一，在祖國果汁市場一直鬥個你死我活，市佔率長期高踞頭三位。先唔講商務部嘅反壟斷法，點可以自圓其說，即使批滙源靠攏統一，可樂肯定唔會就此罷休，博定唔博？看官們自己諗過，古勝驚這類消息股又係一兩日貨仔玩完。

被大孖沙連環在市場增持的重慶機電（02722），昨日創咗上市新高，收報1.86元。過去兩個月重慶機電累積升咗四成一，但計落仲係平過唔少中資工業股一截，綜合大孖沙預測數字，一○年預期市盈率只係10.9倍，升極都仲屬於落後股，同舊年六月，海嘯前上市定價過分保守有關。

重機業務覆蓋包括商用車零部件、電力設備、通用機械等，產品應用廣泛，由汽車、電力及機械製造，以至冶金、化工及環保行業，近期汽車股炒風從下游車廠蔓延到落後的上游部件供應商，重機有機會炒落後外，國務院西部開發政策，上個月確立十八項重點工程，對這家四川省龍頭企業，中長線有極正面的幫助。

明年業績大幅改善

上半年重機賺2.15億元（人仔‧下同），跌兩成一，但首八個月定單51億元，已達管理層全年預測八成，顯見下半年開始因應內地經濟復甦，4萬億基建陸續投入，重機銷售都有明顯改善，大行估全年賺5.01億元，比起○八年倒退唔夠1%，到明年業績會有大幅改善。

另一短期升勢可能快速理由，係重機街貨極乾，最近兩個基金Hamon及Dreyfus Corp申報揸過界，持貨過咗5%依例申報權益，計埋舊股東包括重慶經濟技術合作公司、社保基金、VP、GE Asset及瑞銀等，已經揸住六成八街貨，以11億發行股數流通量只係3億多，昨日單日竟然有45球易手，可以估計街外攔路虎唔多，只要大孖沙再加把勁，隨時掃到飛天。

古勝