本文重點
今年荷包穩袋一點二億元新台幣（約二千九百一十萬港元），榮登台灣綜藝主持一哥嘅吳宗憲，原本貴為寶島首位擔任上櫃企業董事長嘅藝人，但呢個位唔易坐，佢只係做咗一百六十七日，尋日就宣布唔玩。
翔昇虧損擴大冧價
吳宗憲今年中擔任ＯＴＣ掛牌企業翔昇嘅董事長，轟動全台，大家仲以為佢要退出娛樂圈。但佢持續曝光，每次都將翔昇進軍ＬＥＤ照明領域講得頭頭是道，成個企業家咁款。起初翔昇嘅股價只有五元（新台幣‧下同），「天王」入股之後就飛升至十四元。
不過翔昇嘅虧損持續擴大，舊班底走晒，半年內換咗三個財務長。每次人事更迭冇講明，仲零星傳出勞資糾紛，投資者見唔妥梗係拋貨喇，搞到股價唔值五蚊。公司尋日舉行臨時股東會改選董監事，吳宗憲冇得玩，只係繼續做大股東。
吳天王話董事會係佢嗌開嘅，一切都係計劃中。佢仲話「諧星最大嘅罪過係唔好笑，董事長最大嘅罪過就係唔賺錢」，睇嚟佢都好明白點解董座個夢發唔夠半年喎。
余絲韻