本文重點
「新興市場之父」麥博士管理嘅鄧普頓基金早前宣布，投資由「刁王」鍾楚義揸Fit嘅資本策略（00497），原來兩間公司由「相睇」到「結婚」只係短短個幾月時間，絲絲仲八到，成日周圍飛嘅麥博士喺入股前親身飛去上海睇過資策旗下嘅資產，不過麥博士鍾意親身感受睇真啲，佢只係知會咗公司一聲就飛去睇盤，冇要求鍾生陪佢。
考察資策旗下資產
咁啱麥博士呢幾日飛咗嚟香港，資策為隆重其事就搞咗個簽約儀式。麥博士大讚資策業務有意義：「我見過中國好多好好嘅樓宇，但係有啲保養得唔好，而資策可以將呢啲樓宇增值。」
麥博士對資策有萬二分信心，話睇好佢可以增長10%至20%。依家鄧普頓持有資策約2,300萬元股份，再加埋價值7,800萬元嘅可換股票據，如果全數兌換，鄧普頓就會持有資策5.2%股權。麥博士仲話，當股價合適時唔排除會增持添，咁幾多錢先係合適呢？佢就好鬼馬咁話「唔話你知」！
余絲韻