港股連彈三日後，市場再無「筍嘢」執，早兩日的炒風亦見收斂番，但個別板塊仍有好強烈炒味，照睇今轉應該算未炒完。經過上周五嘅大震倉，現時貨源更為歸邊，易上難落。古晨發覺近日資金開始發掘落後寶藏，一啲折讓大、股價又低沉嘅股份，不妨小注買番少少等炒，隨時會有驚喜都唔奇。
尋寶藏遊戲中，古晨幾鍾情隻力寶華潤（00156），貪佢折讓夠大，現時每股資產淨值成0.35元，雖然近期升咗唔少，股價仍然折讓35%。力寶華潤一向出名難炒，由於街貨一向較疏，加上集團以手持不動產為主，所以盈利率一向偏低。不過現時水浸股市，炒資產升值，好似力寶華潤咁大折讓嘅「靚嘢」，已經好難搵。過去兩年以大圓底收集回升，威力強勁，近期有勢炒上，一於死追，暫時以0.3元作為第一目標，止蝕位就定番0.2元。
古晨