本文重點
樓市近月交投稍見放緩，不過，進身代理行業嘅人仍然有增無減，Vincent睇番地監局網頁，見到截至上月底有25,359人持有代理人牌照，連續第四個月創出歷史新高，當中持有俗稱「S牌」嘅營業員有13,289人，按月升3.4%，至於持有「E牌」嘅地產代理數目就微升0.9%，升幅較上個月放緩1.4個百分點，人數有12,070人。
另外，十一月份地產代理持牌人數及商舖牌照數目都繼續創出新高，分別有27,271人及4,589個，較今年低位分別升21%及12%。美聯執行董事陳坤興話，明年樓市應該會繼續向好，相信持牌代理人數會繼續上升。
豪宅拍賣盤有捧場客
近排樓市呆滯，促使買家走去拍賣場尋寶，尤其係拍賣場嘅豪宅盤仲相當受歡迎。Vincent收到風，忠誠昨日推出12項物業拍賣，成功賣出咗5項，而且兩個開價逾千萬元嘅豪宅單位都賣得出，其中西貢清水灣大廈A座一個低層連車位銀主盤，就以開價1,100萬元賣出，有代理老友話，上址面積大約2,400方呎，計番呎價約4,583元，對比此類單位市價大約每方呎5,000幾元，估計成交價較市價低一成左右。
至於同場跑馬地惠園高層B室連車位亦賣咗1,800萬元，高過開價9%，睇嚟豪宅依然有不少捧場客支持。
（Vincent Lau）