港股23,000點遇阻力，市場即時遇上冷風，咁又係，大市連日急升受阻，隨時都會回番一千幾百點。雖然指數回落唔多，但唔少股份都回得幾深，早前啲股炒得咁狠，故回番一、兩成都唔奇。
今次大市抽上，各成分股均見升勢，唯獨是隻中移（00941）無點炒過。曾記得○六年時被封為股王嘅中移，現時淪為藍燈籠，認真可悲。言歸正傳，藍燈籠都有炒作時候，水尾藍燈籠炒勢最勁，單日升幅甚至可以一成咁升，認真唔嘢少。不過，古晨睇中嘅唔係中移，而係佢競爭對手中國聯通（00762）。
自各大電訊股重組後，中移獨大局面改變，聯通亦搶走唔少中移客戶，加上有取得iPhone代理權，真係如虎添翼，尋日電訊股剛起動，聯通價殘有一定值博率，暫時向上睇13.5元，止蝕可以放於9.5元。
古晨