本文重點
童年成長真係好影響一個人嘅性格發展，瑞信股票衍生工具銷售及市場推廣副總裁朱紅（Niki）十歲時與家人由湖北移居香港，細細個已要學識照顧自己，慢慢培養出獨立同堅強嘅性格。「年幼時屋企唔算好富裕，當時政府對新移民家庭幫助有限，有唔少嘢都要靠自己努力，雖然算係經歷過刻苦時期，但過程中令自己變得更堅強，同埋識得去把握每個機會。」
十歲來港苦學會話
Niki講笑話，小時候以為香港人實會識得講國語，點知原來唔係，反而自己就唔識講廣東話同英文，所以佢一得閒就會睇電視劇、聽收音機同聽英文歌，希望可以快啲學識，仲話當時聽得最多嘅歌手係The Carpenters。
雖然Niki係家中獨女，但性格一啲都唔孤僻，仲好鍾意同人傾偈及接觸唔同層面嘅人。「以前擔任金融分析員要經常往來內地，到依家負責推廣衍生工具產品，就有機會接觸到散戶及記者。」Niki話好滿意依家嘅工作，加上見到公司嘅牛熊證銷售成績不斷增長，令佢同團隊都好鼓舞。
余絲韻