有「電鑽大王」之稱嘅鍾志平喺六八年由澳門來香港闖天下，只係讀到中四嘅佢由倉務員做起，到八五年創辦創科做「電鑽大王」，又係一個典型嘅香港人奮鬥故事。絲絲仲記得佢當年玩Accumulator都中招，不過佢依然笑住過日子，當買個經驗喎！仲笑言已經調整投資策略，就係投資喺自己身上。

自去年起減持創科

其實今年57歲嘅鍾志平除咗做生意醒，仲好熱心公職，佢依家係香港工業總會副主席、工總屬下嘅優質標誌局委員會主席、職業訓練局委員等，話唔定佢退休後會做多幾個公職。不過，創科嘅投資者可能要留意，因為鍾志平去年起已開始減持創科，公司亦講明佢減持係為退休作準備，如今佢仲持有6.83%創科股份，唔知會唔會喺退休前減持晒呢？

余絲韻