本文重點
呢排上海搶晒香港嘅風頭，進入倒數嘅世博會吸引咗全球目光，爭取咗10年嘅迪士尼又終於塵埃落定，成個上海喜氣洋洋。咁多喜事臨門，縱橫上海、江浙一帶嘅復星國際（00656）主席郭廣昌原來都好唔得閒，仲完成咗件「不可能嘅任務」！
世博民企館極速搞掂
今年四月，由於某外國企業臨時退出世博會，郭廣昌被臨時拉伕接手籌備最後一個動工嘅民企館。由於距離開幕僅餘一年零半個月，於是佢使出渾身解數作最後衝刺，由上海奔赴杭州搵阿里巴巴（01688）老細馬雲，又攞埋紅酒去搵其他民企老總，最終成功號召十幾間民企參展。依家佢係民企館嘅形象大使，佢嘅助理就做咗館長。
郭廣昌旗下企業有過百間，佢想做內地李超人嘅雄心壯志，大家都知。但絲絲估唔到，佢今年仲未夠40歲就咁有號召力，喺講究論資排輩嘅內地嚟講，真係唔易㗎！
余絲韻