本文重點
恒大地產（03333）幾經波折，喺尋日終於上市，呢隻「土儲王」招股以嚟一直得到唔少「大孖沙」支持，其中又以新世界發展（00017）主席鄭裕彤嘅家族最畀面，首先喺上市儀式就派出阿仔鄭家純做代表，見證恒大掛牌一刻，「純官」亦賣花讚花香，話恒大好有發展潛力，所以新世界喺一年前已經同恒大合作。
猛人到賀 酒會盡興
除咗「純官」，港交所（00388）行政總裁周文耀及候任行政總裁李小加亦雙雙撐場，不過周文耀似乎好趕時間，做咗「快閃黨」；李小加就逗留耐啲，佢亦好親民咁周圍同人傾偈。港交所揸Fit人咁畀面，恒大亦好識做，送咗個「水晶樓盤」畀港交所做紀念品，正路兼貼題。
到咗夜晚嘅慶功酒會，場面更加熱鬧，「彤叔」親身到賀，另外長實（00001）執董葉德銓、英皇集團主席楊受成、奧園（03883）主席郭梓文都嚟咗，大夥兒開飯前先留守喺VIP房。絲絲知道「彤叔」閒時愛好「鋤大D」，唔知幾位老細有冇鋤番兩鋪，抑或喺房度傾生意呢？「彤叔」就同絲絲講，話好滿意恒大嘅股價表現，但就唔肯講自己帳面賺幾多，只話係長線投資喎！
余絲韻