本文重點
編製恒生指數嘅恒生指數公司，自從將恒指「變天」，破天荒將H股加入恒指以及將恒指成分股數目「33」隻呢個Magic number加大至為上限50隻後，近年改變一貫保守策略變得進取，推出多個指數，更進軍內地市場。恒指公司嘅一番心血終於獲得認同，佢哋獲得《亞洲投資者》（Asian Investor）雜誌頒發「最佳本地指數服務商」獎項。
近年積極推新指數
公司近年動作之多，就連伴隨公司多年嘅「恒指服務公司」名稱，亦改為現時嘅恒生指數公司。
《亞洲投資者》今次嘅甄選準則，包括所編製嘅指數數目、本地及環球投資者追蹤指數嘅資產總值、海外市場嘅指數數目以及推出嘅新指數等。截至上月底，與恒指公司編製指數掛鈎嘅交易所買賣基金之管理資產總值逾115億美元，加上公司近年推出嘅新指數多不勝數，好似AH股指數系列、短倉及槓桿指數、房地產基金指數、神州50指數、A股行業龍頭指數等，得獎算係實至名歸。
余絲韻