曾任董事去年始請辭

唔講唔知，原來高錕與上市公司亦有淵源，佢曾經係晶門科技（02878）嘅獨立非執行董事，於○四年三月加入該公司，晶門其後於同年四月喺港交所主板上市。做咗4年後，高錕於去年二月二十九日請辭，話希望能有更多時間與家人共聚天倫。

晶門科技對於董事局前成員攞到諾貝爾物理學獎，亦感到無限光榮。為咗慶祝高錕獲獎，公司將一幅以前董事會影落嘅大合照，每人簽上名並加上恭賀說話，寄咗畀喺美國嘅高錕。唔知高錕收到相片後嘅感受如何？絲絲心諗，收到相片可能比起登廣告祝賀更有親切感呢！

除咗晶門科技外，高錕原來亦曾做過新意網（08008）獨立非執行董事，於○七年一月退任。

高錕研發光纖通訊傳輸系統多年，早已喺英國、美國、瑞典及日本等國獲獎無數，無論喺科技及學術嘅成就，早已獲得肯定及認同。絲絲就同好多香港人一樣，好期待佢踏上頒獎台領獎一刻，希望嗰日快啲來臨。

余絲韻