本文重點
港交所（00388）上市科主管狄勤思自從今年三月初正式上任後，除咗出席上任後首個記者會及港交所業績發布會外，較少公開露面，佢喺本月二十四日就會應證券專業學會嘅邀請，出席港交所高級主管系列嘅研討會，算係佢上任後首次演講，應該會吸引唔少人嚟捧場。心水清嘅朋友可能即刻諗到，佢太太邵蓓蘭係證券專業學會主席，所以狄勤思以行動支持吓該會嘅活動都好應該。
上市政策諮詢「踢晒腳」
今次研討會嘅主題係上市政策嘅最新發展，絲絲就真係好想洗耳恭聽，事關近期真係有好多涉及上市政策嘅發展，諮詢文件亦推出咗唔少，好似關於縮短供股時間表、簡化上市程序、認可內地財務報表等，遲啲仲會推出檢討礦務公司上市要求、簡化關連交易等等諮詢文件，仲未計備受市場矚目嘅季度業績諮詢、上市規則法定化等棘手項目，真係多到令人眼花撩亂。身為上市科主管嘅狄勤思，要兼顧咁多範疇，真係睇少陣都唔掂。
依家政府最重視港交所三項發展，包括海外公司來港上市、簡化上市程序及上市規則法定化，單單都同上市科有關，狄勤思嘅擔子都好重，尤其係周文耀明年初就告別港交所！
余絲韻