本文重點
財經事務及庫務局局長陳家強喺下周四及周五，將率領一眾金融界拉隊到上海進行訪問。上海同香港一直存在競爭，中央更有意將上海喺二○二○年打造成國際金融中心，相信今次訪問會吸引唔少金融界人士參與，大家都想了解吓上海嘅領導喺金融發展上有何構想。
會見各機關領導
絲絲暫未知道代表團總人數，但已聽聞唔少金融界人士已收到局長嘅英雄帖，亦已抽定時間，準備畀面出席。陳家強今次訪問上海，係佢繼今年五月率團出訪廣州後，再一次到內地訪問，目的係加強中港兩地嘅金融合作。喺呢短短兩日行程中，佢會會見上海市領導，亦會同上海市金融辦、中證監、中銀監、中保監嘅上海監管局領導見面，亦順道參觀上海交易所及世博場地。
金融業界最關心嘅議題，除咗係香港同上海嘅競爭外，相信就係同內地嘅金融合作，好似港股ETF幾時可到內地上市、喺CEPA 6框架下成立合資諮詢公司以及上海籌建國際板嘅進展，睇嚟今次訪問大家都有唔少期望！
余絲韻