本文重點
中國概念受全球投資者追捧，絲絲見到金管局幾乎每日都要注資，就知熱錢流入中華區情況有幾勁。美國新成立嘅電動車生產商Coda Automotive為咗要打入中國市場，請咗美國前財政部部長保爾森做公司顧問，希望透過呢位「盲公竹」，幫佢介紹個中國合作夥伴。
當Coda顧問搵「拍乸」
講起呢間Coda，啱啱喺六月先正式營運，計劃產銷電動車及交通運輸蓄電系統，最快明年就會推出首款電動轎車。絲絲知道內地汽車市場一片好景，每月公布嘅銷售數字都創新高，唔少人自然想分一杯羹，但點解一間咁新嘅車廠，都可以吸引到保爾森加入做顧問？
據Coda新聞稿引述保爾森嘅說話，保爾森認為Coda喺全球搵合作夥伴，資本需求無咁大，呢種靈活經營模式最終說服佢加入當顧問。
當然最重要係Coda認為保爾森與中國有深厚嘅關係，單睇保爾森同中國多位財金官員咁老友，就知佢幾夠斤両。
余絲韻