雖然經濟仲未全面復甦，但內地已預期通脹即將重臨，部分食品已靜悄悄加價，好似即食麵咁，新一輪加價潮可能已迫在眉睫。
繼康師傅（00322）即食麵早前加價最多達一成後，尋日內地又盛傳另一家大型即食麵生產商統一企業中國（00220），亦醞釀喺八月初正式將即食麵加價。
統一放風周末加價
內地傳媒尋日話走訪咗各大超級市場，雖然超市仍未正式收到加價通知，但統一已向超市放風，話會喺八月一日即係本周末開始將即食麵加價。至於加價幅度，就暫時未知。
其實自從食品老大哥康師傅早排將即食麵加價後，已傳出其他即食麵生產商隨時加入戰團。如果統一今次加價，恐怕其他生產商都會跟隨，加價潮一觸即發。
余絲韻
