時代華納（Time Warner Inc.）旗下 AOL及A Squared將聯手創作一系列以知名人士為主角嘅網上卡通片，當中包括美國「家政女王」斯圖爾特、已故美國太空人薩根等、而最矚目嘅當然係「股神」巴菲特都有份參與。

股神參與製作 AOL網播

據知，巴菲特將會喺一套名為《神秘百萬富翁會所》（Secret Millionaires Club）嘅卡通片擔任主角，喺套卡通片裏面，巴菲特將化身為一名導師，教授一大群小朋友做生意嘅技巧同埋金融知識，片長約3至5分鐘，將於今年內或明年初喺AOL嘅網站率先播放。巴菲特話能夠參與卡通片嘅製作，自己都感到好興奮同雀躍，仲話無嘢好得過教識小朋友財務責任。

巴菲特之所以咁受歡迎，皆因佢嘅投資哲學係實現到嘅，而且有實際回報，好似喺去年九月金融海嘯爆發期間，透過其投資旗艦巴郡購入價值約50億美元嘅高盛優先股及認股權證。日前高盛股價突破162美元，巴菲特持有嘅高盛認股權證帳面獲利已逾20億美元，不足一年就勁賺44%。

難怪同巴菲特老友鬼鬼嘅A Squared創辦人Heyward話，要教識小朋友投資技巧，如果唔搵股神巴菲特，真係唔知搵邊個好！

余絲韻