恐防誤導 太搶眼都唔得

今次證監針對嘅係宣傳設計，凡係文件圖像出現「飛機」、「火箭」、「跑道」統統唔用得，皆因有「上升」意思，怕誤導投資者以為購買該基金一定有賺；「跑道」唔批係因為有「比賽」意思，文件內亦唔可以提到任何「榜首」、「跑贏」呢類反映基金表現嘅競爭性字眼；「增長」及「進取」詞語唔用得、顏色太搶眼亦唔得，驚太吸引人望嗰張單張。絲絲想問句，投資梗係想資產增值，乜都唔得，買基金嚟做乜？宣傳單張作用係乜？

最令絲絲同該市場推廣部唔明嘅，係可愛嘅「熊貓」都唔准用，究竟「國寶」點樣誤導投資者，大家不妨諗諗，係咪公仔太過「獨一無二」，非買不可？對投資產品推廣文件嘅限制係要有，但唔應該過火位，無謂阻礙基金銷售發展，老友話依家好頭痕，咁多嘢唔用得，差啲想搞個徵求意見大會，收集吓坊間有乜好橋。

余絲韻