正由於近日市況調整，大價股唔行，就連細價股嘅炒風亦有所收斂。炒家每日都要發掘新嘅炒作對象並唔容易。尋日新股旭光（00067）上市，炒家有殺錯冇放過，結果成功突圍，隻股最高見過2.39元，全日成交達5.57億元，小尾覺得嚟緊又可以實啲新股，話唔定會有意外收穫。

此外，尋日市場另一焦點，係翻炒資訊科技股，見長城科技（00074）、晨訊科技（02000）及晶門科技（02878）升幅都超過一成，短線可以跟勢留意吓中興通訊（00763）同中通服（00552）。

內地股市呢期交投亦靜咗，事關缺乏利好消息，加上股指仍然高企，部分投資者想先行獲利亦可以理解。不過，嚟緊月底係基金半年結，相信芬佬唔會放過做靚組合個機會，故不能完全排除月底前大價股再次起飛嘅可能性。

（小尾）