本文重點
花旗集團雖然喺美國嗰邊身子弱，但勝在阿仔夠生性，花旗香港業務仍然勇進，最近仲攞埋之前由大華銀行（UOB）負責嘅政府採購卡合約，擺明話你知連港府都對佢哋信心十足，作為佢哋客仔仲使乜驚！
金融海嘯令唔少海外機構撤出本港市場，包括UOB。UOB撤出後剩低嘅港府採購卡合約，隨即令銀行界虎視眈眈，據聞花旗香港揮低咗包括渣打、東亞（00023）、中銀香港（02388）、大新及美國運通等對手，先攞到呢個業務嘅經營權。
同獅子銀行有激鬥
攞咗呢份合約有乜好？最好係花旗即刻多咗3,000個政府客仔，呢批政府僱員要進行採購時，就會用張卡買嘢，花旗仲會為政府嘅供應商提供收單服務。除咗花旗，可以發行港府採購卡嘅仲有獅子銀行。
首次攞到合約嘅花旗雄心壯志，拍心口話年底前可搵到8,000個商戶畀班政府客揀，仲話着數陸續有嚟。睇嚟兩行有一番龍爭虎鬥，對客仔嚟講係好事。
余絲韻