本文重點
恒生銀行（00011）副董事長兼行政總裁梁高美懿甫上場，就多番表明重視內地市場，今次仲用行動證明。佢哋繼○六年後，今年嘅董事會議又再度北上，不過今次由上海搬咗去山東省煙台市，董事會成員都好齊。
陣容鼎盛顯見重視
煙台除咗係山東省第二大城市，仲係恒生內地策略夥伴之一嘅煙台銀行之根據地，去年底恒生用8億人仔買咗煙台銀行20%股權，今年仲借調員工及提供培訓等。可能梁太驚咁樣都未夠顯示佢哋對煙台嘅重視，所以今年董事會議直頭搬埋去嗰度，董事長錢果豐、煙台市市長、副市長、秘書長等都有出席，陣容相當鼎盛。
恒生○六年時同樣喺內地舉行過董事會議，仲記得當年一眾董事喺外灘擺晒靚靚「甫士」影相，包括有滙豐當年嘅總裁兼行政總裁邵銘高以及恒生前副董事長兼行政總裁柯清輝等，短短3年時間，呢兩位仁兄已離開大笨象嘅懷抱，前者去咗澳紐銀行做大班，後者就退休享清福。
余絲韻