本文重點
今次大健做細，多得Baby幫我做替工。喺政府高官訪問台灣之前，我已經動身去咗台北旅行，今次由一張相片開始講「台股熱」，張相係我喺台北西門町影嘅，呢間雨傘舖做個燈箱招牌寫明「晴天九折，下雨沒折」。同一把雨傘，落雨時賣貴啲，無讀經濟學都會明點解，但老闆高明在運用語言藝術，將「坐地起價」包裝成「平日優惠」，台灣人果然有商業頭腦。
地道台股ETF將登場
最近「台股熱」愈嚟愈多人留意，其實台灣加權指數上個月已經升咗近15%，究竟目前台股估值仍然屬於「平日優惠」，抑或已經「坐地起價」？呢層留畀你自己諗。如果真係想上車，據講下個月底前會有一隻依家喺台灣上市既ETF（交易所買賣基金）「台灣50基金」喺香港上市。
如果怕等唔切，你可以諗諗依家喺港股上市嘅台股相關市場研拓產品（MAP），簡單講即係台股相關窩輪。要留意目前無台灣加權指數窩輪，但荷銀同高盛就各有一隻MSCI台灣指數認購證。美林亦有兩隻「美林台灣新勢力港元指數」窩輪，呢個指數係由美林研究部負責選股。另外，花旗都出咗3隻玩法與窩輪相似嘅「參與證書」。講到尾，買之前記緊睇清楚條款，唔明就問發行商或者電郵問我。
等人幫手先要自強
台北仲有另一樣嘢令我眼前一亮。我喺西門町發現一個檔口仔由聾人負責看檔，專賣十蚊新台幣一個嘅「巧楓麵包」，係由桃園縣聾啞福利協進會推廣。我都幫襯過，講真味道普通，但構思值得香港人借鏡。早十年前香港街頭經常有聾人賣公仔，但賣麵包更易令人出手相助，橫掂都要食，只要品質正常，何妨幫襯。
「巧楓麵包」呢個case話你知，只要有個好構思，人哋幫你都爽手啲。香港要做國際金融中心，依家唔止要同上海爭，有人話隨時連台灣都鬥唔過。與其坐喺度等中央幫手，不如先做好自己，自然有人主動幫襯。
（大健）