長線持有係最佳策略

入到賭場，賭仔們都好畀心機咁留意過去開大細嘅紀錄，試圖搵出每個骰盅「固有」嘅模式，假如過去10鋪開出「大小大小大小大小大小」，下鋪買乜？又或者遇到之前開出「大大大大大大大大大大」，你會諗已經開咗10鋪大，無理由唔開鋪細，但賭錢啫，無必要鬥氣。

心理學有所謂「賭仔謬誤」（Gambler's Fallacy），人以為自己能夠預測隨機（Random）發生嘅事情，但其實無咁易。以擲銀仔說明，第1次擲出「公」，你諗第2次「應該」擲出「字」，但結果都係「公」，咁會加強你覺得第3鋪擲出「字」嘅機會，但其實每次擲銀仔，「公」和「字」出現嘅機會都係各50%，每次根本無關係。

美國經濟學家Burton Malkiel喺一九七三年出嘅《A Random Walk Down Wall Street》（漫步華爾街）書中提到，歷史數據唔能夠用嚟推斷股市未來走勢，股市係隨機及唔能夠預測嘅，Burton認為技術和基本分析係浪費時間，搵隻馬騮向報紙財經版擲飛鏢揀股，回報可以媲美專業嘅基金經理，佢堅持買入並長線持有係最好嘅策略。

上個禮拜恒指高低波幅只有860點左右，但晏晝個市每每峰迴路轉。過去5個交易日每晝恒指出現以下情況「升升跌跌升跌跌升跌升」，如果你估今日港股會先「跌」後「升」，咁你就真係無得救嘞！樓市同股市或者都一樣，資金來去無蹤，銀行今期鬥劈按息，可能又吸引到一啲上車盤。截至上周末下午6時的《東方產經》網上民意調查，31%網民話依家是買樓時機，59.5%就話唔係，9.5%話唔知道。

港美藍籌股今齊執位

今日係美股歷史性嘅一天，通用汽車及花旗正式被剔出道指，由思科和Travelers頂上。自消息公布以來，花旗股價跌約7%（通用汽車已經轉咗去場外交易），思科和Travelers就同樣升約7%。道瓊斯工業平均指數有30隻成分股，最初推出時（一八九六年）成分股只有12隻，當年所有藍籌都係工業股，今日仍然留得低嘅只有通用電氣，但通用電氣亦曾兩次被剔出道指，時為一八九八年及一九○一年，而自一九○七年重返成分股行列，就一直無被叮走過。

今日恒指成分股都有變動，裕元（00551）正式被Out，華潤電力（00836）就加入，消息公布至今，裕元股價微跌0.2%，華潤電力就升咗13%；另外，今日起滙控（00005）佔恒指比重上限由約18%降至14%。話時話，恒指由一九六九年推出至今，邊啲成分股還一直「健在」呢？答案係中電（00002）、煤氣（00003）、九倉（00004）、滙控、港燈（00006）及太古A（00019）。

成功投資須控制情緒

上兩個禮拜電視劇《Mr Brain》終於喺日本播嘞，故事係講用右腦思考嘅木村拓哉屢破奇案，Baby當然捧場啦。左腦負責邏輯思維，專做分析和判斷，而右腦主導情緒，對藝術和圖像敏感。富國私人銀行首席投資顧問Dean Junkans舊年寫咗本《The Anatomy of Investing》（解剖投資），佢認為成功嘅投資者必須有效控制情緒，不要讓右腦主導，尤其市況不明朗下，人很易被貪婪和恐懼影響而做錯決定。

「Greed is good. Greed is right」係來自一九八七年電影《華爾街》大鱷Gordon Gekko嘅名句，佢話貪婪係好、係正確嘅，但佢嘅下場係被關進大牢。聽講《華爾街》續集開拍在即，並會加入金融海嘯背景，米高德格拉斯再飾演Gordon，十萬個期待！但米高扮索羅斯會否更神似呢？

（Baby）

若然有料想報畀大健或有嘢問，可電郵money.biz@opg.com.hk