大市欲跌唔跌，大價股需要回氣整固，資金又向股仔埋手，上周五再度炒至忘形。市場水浸，唔少人又患上缺貨恐懼症，形成唔少股仔一郁就個個狂追貨，一日升兩、三成都唔奇。
其實今次大升浪中，古晨發覺股仔就算升得再急，最多都只係原地踏步回吓氣就算，鮮有大散跌番落去，所以現時買股仔最重要係講耐性，如果一失去耐性，往往就係等你一沽完，轉頭隨即急升三成，咁就真係嘔血。
就好似隻林大（00910）咁，早前一路炒上，但期內見西京投資不停減持，其持股量由10%一直減至得番5.9%，計落咁大沽壓，應該企唔住0.5元先啱，點知整固咗幾日，上周五尾市竟突破0.5元再爆上，氣勢一時無兩，看來西京減持嗰4%街貨已經盡入強者手。由於林大剛剛破位，一於追佢，先睇0.7元，止蝕位就放於0.44元。
古晨