本文重點
被喻為「最神奇預測家」嘅摩根大通首席經濟師龔方雄尋日開記招分析中國經濟，但見時間一分一秒咁過去，龔博士都未出現，點解呢？
患感冒與記者「隔離」
原來龔博士患咗感冒，所以自我隔離緊，惟有用Speaker同大家開電話會議。
雖然有病在身，但龔博士把聲不但好精神，仲好歡愉添。佢講解完對中國經濟嘅睇法，就好開心咁宣布，自己同埋研究團隊又攞咗金融界「奧斯卡」——被機構投資者選為中國最優秀嘅研究團隊，今次已經係四屆蟬聯，打破埋之前嘅三連霸紀錄添。攞咗獎自然要講感受，龔博士就話希望研究要領先市場，做出前瞻性嘅預測。
龔博士嘅預測直情神奇啦，正如佢上年預測中央會推出大型刺激經濟計劃，就真係準到無人有，結果被人懷疑佢有內幕。早前證監會又暗批啲機構透露決策層訊息噃，龔博士對於惹人非議又點睇呢？佢回應時就話自己做研究係講事實驗證，有數據支持。龔博士最後講到上海立志要當國際金融中心，佢語重心長話，香港毋須同上海爭內地企業掛牌嘅生意，應該放眼國際，應作為內地資金邁向國際化嘅跳板。
余絲韻