本文重點
所謂有危便有機，當大型企業削減人手之際，反而係新興企業吸納人才嘅好時機。正處於產業提升關鍵時刻嘅中國製造業，現抓緊機會吸納被稱為「高級藍領」嘅日本製造業優才，並為日本就業市場提供新出路。
日企削員 內企吸才
創意設計及高質素生產一向係日本製造業嘅驕傲，但松下、新力及日立等九大電器生產企業都敵唔過當前嘅不景氣，估計裁減逾6.5萬人，日本製造業人才過剩嘅情況可見一斑。據統計，日本及歐美等先進國家被稱為「高級藍領」嘅技術專才，平均佔製造業人口40%之多，相對來說，中國嘅「高級藍領」佔製造業人口比例卻只約5%，內地與歐美日製造業嘅技術差異不言而喻！
大批日本技術優才從企業流失，有內地企業睇準機會聘請佢哋來華工作，藉此引進日本大型企業嘅生產及管理技術，提升本身競爭力。對規模較細嘅中小企業嚟講，要高薪聘請日本專才當然有一定困難，但亦衍生咗另類商機，好似阿里巴巴最近就透過喺日本嘅網站，協助日本製造業優才向內地中小企業提供顧問服務，創造更多市場機會。
余絲韻