有朋友話我炒匯都幾爽喎，日日可以瞓到黃朝八晏先至起身。各位炒匯嘅一定唔認同。因為我哋過嘅係早睡（朝早先瞓）晏起、一日可能做足十幾個鐘頭、而且又神經緊張嘅非人生活，所以如果回報冇番咁上下，邊有人做。當然，如果個市有波幅，你又做啱邊，執咗廿零三十點就滿足，咁樣隨時幾分鐘就收得工。
尋日十點半鐘後先至起身，見到隻鎊上到1.49六十幾，唔追啦！一來仲係亞洲市，二來未破1.5，第三英國休市，所以決定觀望。雖然隻鎊上過1.4979，但好快回番落去，到東京市尾段再衝一衝1.49六十幾就冇力，之後仲回番落去1.49邊，跟住仲穿埋，歐元都跌穿番1.33。
歐元弱可以理解，因為星期四歐洲央行好大可能減息，雖然多數只會減0.25厘，但隻歐元應該唔會企喺高位等減息啩？後來諗諗吓，我見歐元跌穿1.33之後彈唔番上去，於是喺1.3280沽咗一手，目標價暫時望住1.3180，因為10日線同20日線都喺1.3175附近，我諗跌到差唔多水平會有支持，今次又炒番歐元，睇吓有冇運！
蘇小妹