祖國移動（00941）經過個多月的升市過程中，不僅表現落後，大戶直情係當佢無到，昨日卻一反常態，成為魚缸火車頭，股價勁升7.6%，報收72.45元，為指數帶來200點進帳。之前祖國移動不斷被大行吹水報告唱淡，尋日卒之見「高佬盛」幫佢美言幾句，建議投資者由祖國電信（00728）換貨至祖國移動。
港交所成挾倉主力
至於大笨象（00005）反而無咁落力，早段升幅落後其他大隻佬，可能係缸邊友對今個星期四花旗聯儲局公布錢莊壓力測試仍有忌諱，唔敢太進取掃錢莊股。下半場大笨象稍為肉緊些少，升幅擴大至近4%，報收56.9元。另一魚缸動力係港交所（00388），魚缸成交額回升，成為好友掃貨藉口，股價急升8%至97.7元。不過，古勝認為港交所現價估值偏高，只係好友要挾淡倉，街貨疏落的港交所，正好成為挾高指數的最佳武器。
以為豬流感或打擊飛機股及航運股，相反流感疫情未有惡化，加上各地經濟有回暖迹象，刺激呢類股份上升。
本地魚缸在短短三個交易日，勁升1,826點，淡友呢鋪損失慘重，昨日有近百隻熊仔被強制回收，部分指數熊仔更因為指數高見16,300水平，變得一文不值。雖然好友咄咄逼人，但在下堅持家陣係大型上落市，而非牛市重臨，大戶可以三日挾高千八點，要三日跌逾千點亦唔出奇。總之看官量力而為，無論魚缸上落亦無影響。魚缸有波幅，鑊鏟友仲有得玩，最怕係無晒波幅兼成交縮水，咁就真係要食西北風。
中國通信服務（00552）日前獲施羅德投資增持近4球，平均一股入貨價係4.59元，昨日中通服報收4.75元，升3.2%，呢個價只係略高於芬佬加碼價，即係現價仲可以追。集團○八全年經營收入為324.71億元（人民幣‧下同），同比增長37.9%，淨利潤為13.16億元，同比增長12.8%，每股盈利為0.232元，同比增長8.4%。
受惠3G即將開通
祖國下個月的3G業務正式開通，古勝估計呢段時間，相關設備股可以落鑊炒番轉。中通服唔單止祖國業務發展理想，去年收購中通建後，獲得北部10省的業務，加上其原有的西部及南部地區業務，正式覆蓋全國各地。
另一方面，國策亦支持企業「走出去」，為旗下海外業務提供良好發展環境，去年海外業務收入便錄得50%增長至6.54億元，雖然目前佔整體收入的比重不高，但加強拓展海外業務下，未來可成為另一盈利增長動力。
古勝