整個四月份，終於在一片擔憂以及驚訝氣氛中正式結束。令人擔憂的是，豬流感（H1N1甲型流感）及後到底會為全球股市帶來多大的影響；而令人驚訝的則是，港股好似未受影響，恒指最後更企穩在15,500點樓上收市。
有人話，上周恒指不跌反升，更上破10日線水平，即係代表大市經已轉勢，及後將會拾級而上；但亦有人話，上周出現的只係假突破，加上本港已錄得首宗確診豬流感個案，故認為恒指跌勢將如黃河決堤般一湧而下。咁到底恒指今日能否衝破16,000點，似乎就係全日關鍵所在，因此相信在15,500點至16,000點間，將有一番龍爭虎鬥。
未知是否佳士拿申請破產保護令後，內地都體察到汽車企業營運中所面對困難，因此市場傳中央將進一步下調汽車購置稅，故消息一出，汽車股繼續被受追捧，汽車股總算開動了「引擎」，但又可維持幾耐呢？
（小尾）