本文重點
香港流感警戒提升至最高嘅「緊急」級別，Baby即時決定由每星期運動一次，提高至三次，由一個星期食唔到一個橙，無限調高至每日食半個橙（或相同分量嘅維他命C，可同時美白），當然同時加緊注意個人衞生。股友們，如果你哋平日喺魚缸打躉，或者喺銀行同人爭「㩒機」，就要勤洗手、戴口罩，見頭暈身熱，就唔好仲心掛掛炒股，盡快求醫！
世衞為豬（應該係豬肉商）平反，唔叫「豬流感」，正名H1N1甲型流感，其實豬肉期貨上周跌停板後，已一度出現反彈，主要係早前Short咗期豬嘅投資者平倉獲利。
唔識亂炒如任人劏
芝加哥商品交易所（CME）提供「瘦肉」（Lean Hogs）同「雪藏豬腩」（Frozen Pork Bellies）期貨、期權，每張期豬講緊四萬磅豬肉，交收嘅豬肉唔係用肥瘦去分，合約寫明「瘦肉」係指一隻隻劏好嘅豬身，「雪藏豬腩」則是已切割好嘅冷凍豬肉。
七月份「瘦肉」同「雪藏豬腩」期豬價格上周分別收報每磅六十八點三七五美仙同七十八點一二五美仙，每張合約價值二萬七千三百五十同三萬一千二百五十美元。香港都有證券行做期豬，入場費一、兩千美元。投資者要注意玉米價格，因為玉米係豬嘅主要食糧，仲要留意期豬停板制度和交投一向唔活躍。唔識美國豬肉市場而去炒期豬，就如同瞓喺豬肉枱上任人魚肉。
（Baby）