依家口罩賣緊幾多錢？傳出疫情後，口罩好炒過股仔。我聽見有藥房賣到120蚊50個口罩，有人話咁樣係趁火打劫，牟取暴利。其實市場經濟就係咁，價錢由供求決定，你可以話社會利益唔畀起價，仲要叫政府「穩定」市場，不過如果你炒股仔，密密儲貨終於等到一個機會爆升，跟住政府話要「穩定」股價，㩒住唔畀升，你會點反應？你諗諗，即使商人囤積居奇都要冒風險㗎！
股友趁升市走貨
見到「珍姐」，我覺得自豪又自卑，香港出個世衞（WHO）總幹事，但好似又提醒番大家香港曾經成為疫區。唔少人用○三年沙士時股市走勢預測今次「疫市」，但次次唔同好難直接比較。嘩！如果用一九一八年發生嘅「西班牙流感」做比較就嚇死人，當時全球約17億人口中有近30%染上西班牙流感，全球有4,000萬至5,000萬人因此死亡，仲間接令第一次世界大戰結束。西班牙流感同今次一樣係「H1N1」型。
今次疫情會搞成點無人敢擔保，各國政府偏向講得悲觀一啲，實行管理期望。我成日提嘅「預測市場」（Prediction Market）網站intrade.com已經有流感相關期貨合約買賣，當中最活躍係美國今年六月份將有500宗以上確診個案嘅合約，最新報價90美元，代表市場估計發生的機會率有90%。
環球唔少股市「疫市」做好，上周港股收報15,520點，一周升1.72%。股市無懼流感，股友見愈升愈擔心，唔少趁機沽貨。股友蓉姐話：「我好驚隻『豬』呀！搞到我即刻沽貨，依家最擔心會傳入內地，如果內地有人感染，後果會好嚴重，到時國企股一定大跌，對港股實有負面影響。」
天行聯合證券上水分行經理鄧禮梅都話，流感殺入香港，股友自然睇淡後市，唔少股友趁升市沽貨，但又唔敢睇得太淡，尤其喺升市下，股友唔多唔少忍唔到手去買貨，所以提醒大家一定要嚴守止蝕。
37％人估見13000點
後市如何，要
實疫情發展，香港已經出現確診個案，既然係咁，試吓學中醫用「望、聞、問、切」，為「疫市」斷診。
先嚟「望診」，用德銀嘅窩輪同牛熊證資金流數據睇吓股友部署。上周一至周三分別有7,305萬元及2.71億元淨流入恒指認沽證同熊證，相比流入認購證同牛證唔夠640萬元，可見股友不斷做淡；依家收回價喺16,000至16,399點嘅恒指熊證，街貨相等於沽咗2,716張期指。講開牛熊證，最近荷銀推出牛熊證SMS（短訊）提示服務，唔收錢，不妨上佢哋網頁睇睇。
再嚟「聞診」，如果豬流感發展到○三年沙士時咁情況會點？世銀○五年曾指出，套用○三年沙士經驗，若流感大爆發，將拖累全球經濟增長損失2%。有份○六年二月由澳洲國立大學學者發表嘅研究指，疫症對經濟損害包括人力流失、營商成本上升、消費需求改變以及國家風險上升。
至於「問診」，今次《東方產經》網上民意調查問股友，受豬流感影響，你認為短期恒指支持位在哪？截至上周末晚上6時，37%人話會跌到13,000點，23.5%人認為調整至12,000點，更有20.2%人覺得要跌至11,000點，19.3%人就認為影響不大。
最後「切診」，就試吓用技術分析。上周四恒指以裂口高開，仲收復10天同20天平均線，但係MACD（移動平均線）仍未發出買入訊號，所以我唔敢太睇好。
太完美或者係假象
上周港股「疫市」上升，主要受美股帶動，我當然有戒心。可能美國人唔似我哋近距離經歷沙士，仲未知有幾恐怖。我睇咗新上畫嘅《怪誕隨意門》，新戲好多人未睇，所以唔多講劇情，總之我領悟到，好多事太好、太完美，可能只係假象，甚至係陷阱。依家係我哋太悲觀，定係人哋太樂觀呢？
「疫市」令我記起《槍炮、病菌與鋼鐵：人類社會的命運》呢本書，幾年前Hit過，一直想睇未睇。疫情令「牛熊之爭」被放埋一邊，但我嘅「牛一」就喺上周出現咗，多謝晒「飽死荷蘭豆」嘅蛋糕，仲有好多人嘅SMS來電，完全收到。
（大健）