本文重點
「獅子銀行」近排裁減100名私人銀行部員工，雖然以人數計不算太誇張，不過被裁的個個都是業界精英，搞到最近金融圈人心惶惶，大家都擔心自己會被下一個裁員漩渦捲走。就連中環各大名店都受到呢股低氣壓影響，生意因此大減，據名店的靚女店員講，每逢「獅子」怒吼，第二日的生意一定好差。
金占士都感受到這股低氣壓，前兩日行入間中環名店，穿得寒酸的金占士亦吸引到幾位靚女上來招呼。點解可以享受到如此貴賓級服務，全因「獅子銀行」的震撼力驚人，靚女店員話成個朝早莫說是開單，真係連一個客人行入舖都無，靜到連自己的呼吸聲都聽到，你話個心幾慌，難得見到金占士大駕光臨，唔幫襯都有得開吓口講嘢，這種冷清程度真是直逼「沙士」期間。
消費主力被開刀
「獅子銀行」是香港最大僱主之一，一舉一動都是焦點，今次私人銀行部門炒人，全部都是市旺時搵大錢之人，仲要是精英分子。失業不但無收入，對自尊都好大打擊，金占士就親耳聽到靚女店員收到個客的電話，表示放棄早前落訂買的心頭好，因為已沒有必要着靚靚去Ball場，以免要向人交代近況。
其實這種冷清場面並不罕見，金融圈一向是中環消費主力，聽聞近月每有大公司裁員，這些專賣高消費產品的名店就會出現小貓三、四隻的情況。最近難得股市反彈，樓市又見小陽春，大家以為最壞情況已過，殊不知裁員潮一浪接一浪，睇怕呢類拍烏蠅的日子間唔中都會再出現。
金占士