本文重點
中銀香港去年發行奧運「廿蚊紙」特別版紀念鈔票，相信大家都仲記得好多人大排長龍去分行入貨嘅場面，原來故事未完，中銀香港話呢批「廿蚊紙」嘅銷售總收入係5.09億元，扣除啲奧運特權費、設計、印刷、裝幀、銷售等成本後，淨賺3.13億元。
好多人都諗，中銀香港賣銀紙高過「面價」咁多，真係賺唔少，不過中銀香港原來無將筆錢放落自己袋，而係捐晒出嚟，認真唔話得。
1.53億撥慈善基金
啲錢原來部分用咗嚟幫啲運動員，中銀香港捐咗1,000萬元畀港協暨奧委會旗下嘅香港運動員就業及教育計劃，仲另外捐1,000萬元畀四川做賑災重建。
剩番嗰幾億元一樣用晒嚟做善事，中銀香港慈善基金就分到1.53億元，又捐咗9,000萬元畀中銀香港暖心愛港計劃等！
余絲韻